Við erum mikið fyrir svínalund og þegar systir mín sendi mér uppskrift af svínalund sem er steikt á öllum hliðum og síðan bökuð upp úr hunangs-hvítlauks sósu varð ég mjög spennt og tók skjáskot en steingleymdi svo uppskriftinni í langan tíma. Svo loksins löngu, löngu seinna lét ég verða af því að prófa og varð ekki fyrir vonbrigðum. Einfalt, stórgott og mjög fljótlegt. Fullkominn réttur í daglegu amstri.
Honey Garlic svínalund:
- 1-2 svínalundir, magn eftir fjölda matargesta
- 1/2 tsk salt
- 1 msk bragðdauf olía
- 2/3 bolli hunang
- 1/4 bolli kjúklingasoð eða vatn
- 2 msk sojasósa
- 2 msk fínhakkaður hvítlaukur
- 1 msk eplaedik
- 1/4 tsk salt
- 1 1/2 msk kornsterkja
- 1/4 tsk rauðar chili flögur
Hitið ofn í 200°. Saltið svínalundirnar me ca. ½ tsk af salti. Hitið 1 msk af olíu á pönnu og brúnið svínalundirnar á öllum hliðum. Færið yfir í eldfast mót. Hrærið saman hunangi, kjúklingasoði, sojasósu, hvítlauk, eplaediki, kornsterkju, salti og chili flögum. Hellið sósunni yfir og í kringum lundirnar. Eldið i 15-20 mínútur og látið lundirnar standa í 10 mínútur áur en þær eru bornar fram. Skerið í sneiðar og berið fram með hrísgrjónum og salati.
