Mér þykir fátt betra heldur en heimilismatur og fiskur er í miklu uppáhaldi hjá mér. Ég er samt ódugleg við að prófa nýjar fiskiuppskriftir, af ástæðum sem ég er ekki alveg með á hreinu. Oftast elda ég bara sömu réttina aftur og aftur, viku eftir viku en svo inná milli prófa ég eitthvað nýtt. Þessi fiskréttur varð til í ísskápstiltekt hjá mér og var alveg stórgóður. Ég bar hann fram með hrísgrjónum og þetta vakti mikla lukku á heimilinu. Ég er búin að elda þennan rétt mjög oft og þetta er einn af okkar allra uppáhalds fiskréttum. Rétturinn fljótgerður og gaman að elda hann og einstaklega bragðgóður og ekki síðri deginum eftir. Þið bara verðið að prófa!
Ofnbakaður fiskur í camembertosta sósu:
- 700 g hvítur fiskur (ég notaði þorsk)
- 1-2 púrrulaukar (bara hvíti og ljósgræni hlutinn)
- 8 sneiðar beikon (ég nota oft meira)
- 1 dós camembert smurostur
- 1-2 dl matreiðslurjómi
- 1 kjúklingateningur
- 1 tsk sojasósa
- Salt og pipar
- Aromat
- Rifinn ostur (okkur finnst sterkur gouda langbestur í þennan rétt)
Hitið ofn í 175°. Skerið fiskinn í passlega bita og raðið í eldfast mót. Kryddið með salti og pipar og arómati eftir smekk. Skerið púrrulaukinn og beikonið í strimla. Hitið smá olíu á pönnu og steikið púrrulaukinn þangað til klístraður. Raðið púrrulauknum yfir fiskinn og steikið beikonið á sömu pönnu þangað til stökkt. Dreifið beikoninu yfir púrrulaukinn. Setjið næst camembertsmurost og rjóma á pönnuna og hrærið í ostinum á meðan hann er að bráðna. Þegar osturinn er bráðnaður, bætið þá kjúklingatening og sojasósu á pönnuna. Látið allt malla saman á vægum hita í 10 mínútur og smakkið til með sojasósu. Reynið að hafa sósuna eins þykka og hægt er, helst þannig að það þurfi að smyrja henni yfir fiskinn. Hellið sósunni yfir fiskinn og gratínerið með osti. Eldið við 175° í u.þ.b. 20 mínútur eða þar til fiskurinn er eldaður í gegn og osturinn kominn með fallegan lit. Berið fram með hrísgrjónum.
