Um páskana gerði ég svo dásamlega súkkulaðiköku með þristum og þristasaltkremi að orð hreinlega fá henni ekki lýst. Hún er lungamjúk, blaut í sér, með þristabitum og silkimjúku kremi úr þristum og saltkaramellu. Þessa köku má enginn súkkulaðiunnandi láta fram hjá sér fara, því hún er bara svo dásamlega góð.
Þristakaka:
- 200 g suðusúkkulaði
- 150 g smjör
- 175 g púðursykur
- 4 egg
- 1 tsk salt
- 5 msk hveiti
- 1 poki þristar, skornir í sneiðar
Hitið ofninn í 180°. Bræðið suðusúkkulaðið og smjörið saman í potti. Hrærið saman eggjum og púðursykri í skál með gaffli (ekki þeyta deigið á neinum tímapunkti). Hrærið súkkulaðiblöndunni saman við eggin og púðursykurinn. Bætið salti og hveiti saman við og hrærið vel saman. Bætið þristunum saman við deigið og blandið vel. Setjið bökunarpappír í botninn á 20 cm móti og smyrjið mótið að innan. Hellið deiginu í formið og bakið í 45 mínútur. Látið kökuna kólna alveg áður en kremið er sett á.
Saltkaramelluþristakrem:
- 50 g smjör
- 50 g smjörlíki
- 50 g suðusúkkulaði
- 5 litlir þristar
- 2 msk saltkaramella (heimatilbúin eða keypt, ég notaði frá Skúbb)
- 2 msk síróp
- 2 msk rjómi
- 2 dl flórsykur
Þeytið smjör og smjörlíki saman á háum hraða í 7 mínútur. Bræðið suðusúkkulaði, þrista, síróp og rjóma saman yfir vatnsbaði og látið kólna aðeins. Setjið 2 msk af saltkaramellu saman við smjörið og þeytið áfram í nokkrar mínútur. Bætið þristablöndunni varlega út í og þeytið áfram um dágóða stund. Bætið að lokum flórsykrinum saman við í smáum skömmtum og þeytið vel á milli. Þeytið kremið að lokum í 8 mínútur eða þangað til það er orðið alveg slétt og silkimjúkt. Setjið kremið yfir kökuna og skreytið að vild.
