Ég elska hægeldað kjöt, þá sérstaklega hægeldaða nautahnakka og svínahnakka. Það er einhver skemmtilegur sjarmi yfir mat sem tekur stutta stund að útbúa og svo sér hann bara um sig sjálfur í ofninum yfir daginn, auk þess sem húsið fyllist af góðri matarlykt. Þessi réttur er einmitt þannig, tekur enga stund að græja hann og koma honum í ofninn og húsið lyktar dásamlega allan daginn. Þegar líður að matartíma þarf svo ekki að gera annað en að leggja á borð og útbúa kartöflumús. Þetta er ekta sunnudagsmatur í vetrarkuldanum sem er tilvalið að njóta með kveikt á kertum og jafnvel með rautt í glasinu. Uppskriftin er drjúg og það er upplagt að setja afganga af kjötinu í vefjur eða hamborgarabrauð með því meðlæti sem hugurinn girnist. Nautahnakkann keypti ég í Kjöthöllinni, en hann er yfirleitt til í borðinu hjá þeim.
Hægeldaður nautahnakki í kóksósu:
- 1.2 kg nautahnakki, skorinn í 3 cm sneiðar
- Bezt á nautið
- 2 pakkar sveppasúpa frá Toro
- 1 dl nautasoð (eða vatn)
- 3.5 dl rjómi
- 3-4 dl kók (ekki sykurlaust)
- 1 nautateningur
- 2 tsk Worcestershire sósa
- Smá hvítur pipar
- Smjör til steikingar
Hitið ofninn í 130°. Nuddið Bezt á nautið kryddi á nautahnakksneiðarnar og steikið þær upp úr vel af smjöri á háum hita á millistórri pönnu. Raðið nautahnakkssneiðunum í botninn á ofnpotti (eða notið eldfast mót ef þið eigið ekki ofnpott, setjið þá álpappír yfir formið áður en það fer inn i ofn). Setjið nautatening og nautasoð á pönnuna og látið suðuna koma upp. Setjið næst pakkana tvo af sveppasúpu á pönnuna og hrærið öllu vel saman. Bætið rjómanum á pönnuna, smátt og smátt og hrærið vel í súpunni á meðan. Hún á að vera mjög þykk. Setjið næst kók, worcestershire sósu og hvítan pipar á pönnuna og látið allt sjóða saman þangað til súpan er þykk en kekkjalaus. Hellið sósunni yfir nautahnakkssneiðarnar, setjið lok á ofnpottinn og setjið hann inn í ofn. Eldið í 7-8 klukkustundir. Þegar kjötið er tilbúið er það tætt í sundur með gaffli og hrært vel saman við sósuna. Berið fram með kartöflumús.
*Færslan er unnin í samstarfi við John Lindsay
