Þessi filipseyski svínakjötsréttur myndast svo sannarlega ekki vel og er reyndar bara ekkert fallegur á borði, en ég vona að þið takinn viljann fyrir verkið og dæmið hann ekki eingöngu út frá myndum, því það væri nefnilega mjög mikil synd því þessi réttur er æðislega góður, svo góður að ég er búin að elda hann nokkrum sinnum á stuttum tíma. Þetta er ekta helgarmatur, þar sem það tekur að lágmarki tvær klukkustundir að elda réttinn, svo hann er ekki beint hristur fram úr erminni en tímanum er svo sannarlega vel varið og sagan segir að það sé unaðslegt að drekka kaldan bjór á meðan rétturinn er eldaður… Ég not oftast svínahnakka í þennan rétt en það gengur líka að nota úrbeinaðan svínabóg og svínasíðu, en okkur finnst svínasíða alltof feitt kjöt fyrir þennan rétt, svo ég mæli helst með svínahnakka eða bóg. Blanda af svínahnakka, síðu og bóg gæti jafnvel líka komið vel út. Endilega prófið!
Filipseyskt Pork Adobo:
- 1 kg svínahnakki, skorinn í 3.5 cm bita
- Salt, pipar og hvítur pipar
- 1 stór laukur, skorinn í sneiðar
- 8 hvítlauksrif, skorin í sneiðar
- 3 bollar vatn
- 1/2 bolli light sojasósa (fæst í asískum búðum)
- 1 1/2 tsk dökk sojasósa
- 3 msk púðursykur
- 1/4 bolli hrísgrjónaedik
- 1 msk venjuleg sojasósa (má sleppa)
- 1-2 tsk svört piparkorn (má sleppa en ég set 3-4 tsk)
- 5 lárviðarlauf
- 4 vorlaukar, skornir í þunnar sneiðar
Hitið 1 msk af grænmetisolíu í rúmgóðum potti á þar til mjög heit. Nuddið salti, svörtum pipar og hvítum pipar á svínahnakksbitana og steikið helminginn af þeim í olíunni. Takið úr pottinum, setjið til hliðar, bætið 1 msk af grænmetisolíu í pottinn og steikið hinn helminginn af kjötbitunum. Takið úr pottinum og setjið til hliðar. Lækkið hitann í miðlungsháan og steikið hvítlauk og lauk upp úr feitinni í pottinum í 3 mínútur. Bætið vatni, sojasósum, hrísgrjónaediki, púðursykri, piparkornum (séu þau notuð) og lárviðarlaufum í pottinn. Bætið næst öllu svínakjötinu í pottinn og látið suðuna koma upp. Setjið lok á pottinn en látið smá rifu á hann. Látið þetta sjóða í klukkutíma. Þá er kjötið veitt úr pottinum og hitinn undir pottinum hækkaður. Látið sósuna sjóða niður í 8 mínútur. Setjið þá kjötið aftur í pottinn og blandið öllu vel saman. Látið kjötið malla í sósunni í nokkrar mínútur. Berið fram með hrísgrjónum og vorlauk.
