Haustið er að skella á, mér til mikillar gleði, þar sem haustið er uppáhalds árstíðin mín. Ég elska notalegheitin sem fylgja haustinu, þá sérstaklega elska ég haustlegan mat á borð við súpur, gúllas, kjöt í karrí og þess háttar. Í gær fékk ég svo akút löngun í kjöt í karrí að það kom ekki annað til greina en að það yrði í kvöldmatinn og það heppnaðist svo stórkostlega vel að ég virkilega hlakkaði til að borða afganginn í hádeginu og ákvað að setja uppskriftina beint á bloggið. Ég veit að það eiga allir sína uppskrift af kjöt í karrí en þessi máltíð heppnaðist svo vel að ég má til með að deila henni með ykkur.
Kjöt í karrí:
- 1 kg úrbeinað lambalæri, skorið í passlega gúllasbita
- Salt
- Svartur pipar
- Hvítur pipar
- Ólífuolía
- 2 msk lambakraftur frá Oscar
- 2 grænmetisteningar frá Knorr
- 1.5 lítrar vatn
Kryddið kjötið með salti, pipar og hvítum pipar. Hitið ólífuolíu í rúmgóðum potti og brúnið kjötið á öllum hliðum í nokkrum skömmtum. Þegar allt kjötið er brúnað er það sett í pottinn, ásamt lambakrafti, grænmetisteningum og vatni. Látið kjötið sjóða í a.m.k eina klukkustund, ég lét það sjóða í eina og hálfa klukkustund og við það varð kjötið meyrt og bráðnaði á tungunni.
Karrísósa:
- 500 ml kjötsoð
- 3 dl nýmjólk
- 75 g smjör
- 120 g hveiti
- 2 msk karrí
- 1 msk sojasósa
- 2 kjúklingateningar
Þegar kjötið er búið að sjóða í klukkutíma er hálfur líter af soðinu tekið úr pottinum. Bræðið smjör í potti og steikið karríið upp úr smjörinu, bætið næst hveiti saman við, blandið vel saman og steikið í 1 mínútu. Bætið soði, mjólk, sojasósu og kjúklingateningum í pottinn og látið suðuna koma upp. Lækkið hitann og látið sósuna malla í fimmtán mínútur. Berið kjötið og sósuna fram með hrísgrjónum.
