Flestir kannast eflaust við hinn fræga rétt „Marry Me Chicken“, enda hefur rétturinn farið sem stormsveipur um veraldarvefinn undanfarin misseri. „Marry Me Chicken“ er í miklu uppáhaldi hjá okkur og „Marry Me“ kjúklingapasta klikkar aldrei. Þar sem við elskum lax á þessu heimili, þá kom ekki annað til greina en að prófa „Marry Me“ lax sem ég rak augun í á Pinterest. Rétturinn reyndist vera stórgóður og hann er allur gerður á einni pönnu, sem er mikill kostur.
„Marry Me“ lax:
- 800 g lax, skorinn í passlega bita
- 2 msk ólífuolía
- 1 tsk þurrkuð basilika
- 1 tsk hvítlauksduft
- 1 tsk laukduft
- 1⁄2 þurrkað timijan
- 1 tsk rauðar chiliflögur
- 1⁄2 tsk salt
- 1⁄2 tsk nýmulinn svartur pipar
- 1 bolli kjúklingasoð
- 1⁄2 bolli rjómi
- 5 hvítlauksrif, fínhökkuð
- 1⁄2 bolli ferskrifinn parmesan ostur
Blandið kryddunum saman í lítilli skál. Nuddið helmingnum af kryddblöndunni á laxabitana. Hitið 2 msk af ólífuolíu á rúmgóðri pönnu. Þegar olían er orðin mjög heit er laxinn steiktur á pönnunni á báðum hliðum í 4 mínútur á hvorri hlið. Takið af pönnunni og setjið til hliðar. Setjið hvítlauk og sólþurrkaða tómata á pönnuna og steikið í 1-2 mínútur á lágum hita. Hellið kjúklingasoðinu á pönnuna og notið sleif til þess að skrapa allt af botninum á pönnunni saman við soðið. Bætið rjóma, parmesan osti og restinni af kryddblöndunni á pönnuna og blandið öllu vel saman. Hækkið hitann aðeins og látið sósuna malla í 10-15 mínútur, eða þar til hún er orðin passlega heit. Setjið laxinn á pönnuna og látið hann malla í sósunni í 5 mínútur. Berið strax fram.
