Kjötbollur með rjómasósu er einn af mínum uppáhalds hversdagsmat og ég elda yfirleitt kjötbollur í hverri viku. Það er allur gangur á hvaða uppskrift verður fyrir valinu að hverju sinni en þessi uppskrift er í miklu uppáhaldi, enda er hún alveg æðislega góð. Fyrir skömmu kom ég heim úr vinnunni og langaði svakalega í þessar kjötbollur og ákvað að elda þær en í ljós kom að ég átti ekki hráefnin í sósuna. Ég nennti ómögulega út í búð og ákvað að gera kjötbollurnar og redda sósumálunum á annan hátt. Útkoman var æðislega góð og verður klárlega oftar á borðum hjá mér.
Kjötbollur með fetaosti og brúnsósa (breytt uppskrift frá Ljúfmeti):
- 500 g nautahakk
- 4 hvítlauksrif, pressuð
- 2 tsk oregano
- 1 egg
- Salt og pipar
- Fetaostur í kryddlegi, olían látin renna af
- Smjör til að steikingar
Hitið ofn í 150°. Blandið öllum hráefnunum saman og mótið kjötbollur. Steikið upp úr smjöri á meðalháum hita þangað til bollurnar eru komnar með fallega steikingarhúð. Setjið í ofn á meðan sósan er útbúin.
Dásamlega góð brúnsósa:
- 2 msk smjör
- 2 dl vatn
- 3 dl rjómi
- 1 dl mjólk
- 1 bréf brunsósa frá TORO
- 1 nautateningur
- 1/2 tsk hvítur pipar
- 1-2 msk rifsberjahlaup
Bræðið 2 msk af smjöri á pönnunni sem bollurnar voru steiktar á. Þegar smjörið er bráðnað er 2 dl af vatni hellt yfir og suðan látin koma upp. Hellið steikarsoðinu í pott í gegnum sigti. Bætið 1 bréfi af brúnsósu saman við og blandið vel saman. Bætið rjóma, mjólk, nautatening, rifsberjahlaupi og hvítum pipar í pottinn og látið suðuna koma upp. Látið sósuna malla í nokkrar mínútur, þangað til hún er orðin passlega þykk. Smakkið til með rifsberjahlaupi og hvítum pipar.
*Færslan er unnin í samstarfi við John Lindsay
